Ek din

Tumhain us khambay ki awaz aa rahi hai? Koi din mein kaee martaba us ko peeta karta hai. Shayed woh apnay dost tak koi paighaam pohchata ho. Shayad us pit-tay howay khambay ka koi muntazir ho. Wajah jo bhi ho, ye din mein bar bar pit-ta howa khamba meri tawajjo ka markaz zarur banta hai.

Isaaeyon ki ibadatgah kay aqab mein jo pursukoon si sarhak thi woh wahan ghanton ki goonjti howi kaamp mein apni sahaili kay liyay seeti bajati. Kuch hi lamhon baad ek bareek seeti uski janib dowrhti aati aur woh irada kar leti kisi bahanay ka jo isaae madrassa aur yateemkhanay mein us kay dakhlay ki jhooti wajah hota.
"Aay! Tum kon ho?"
"Unzila."
"Tum yahan parhti ho?"
"Nahi to."
"Phir yahan per kis wajah se aaee ho?"
"Meri dost hai yahan."
"Nahi, ye koi tareeqa nahi hai, chalo, bahar jao, shabash."
Woh apni puri taqat se ek kay baad ek gehra saans bharti aur hawa mein lagataar teen chaar seetiyan muntaqil karnay kay baad payr ghaseet-tay ghar ko chalti.

Uski bezarar si zindagi kabhi ek to kabhi dosri taraf naachti dikhaee deti. Deewani si woh, deewanay say us kay girdonawa kay log. Ek roz jab Tariq bhai ko rayt kay oonchay se paharh per jo Amber kay haan aya tha leta dekha to karhi jiddojehad se teelay ko sar kar kay un kay braber mein ja leti.
"Tariq bhai?"
"Hmm."
"Ap yahan kiyun letay hain?"
"Kiyun, dekho, asmaan ko dekho."
"Bohat dur hai!"
"Bohat wasi bhi."
"Bohat piyara bhi."
"Bohat neela bhi!"
"Bohat sajeela."
"Bohat rangeela!!!"
"Bohat shameema!"
"Hahahahahah."
Hanstay howay Tariq bhai us kay gaal per halka sa thaparh maartay, kaprhon se rait ko jharhtay aur chalay jatay kisi aur duniya mein jo sirf Tariq bhai hi dekh saktay thay.

Shaam ki cha-ay ki kaitli jab shore karti to saath mein braber ki deewar se koi sar jhankta aur awaz aati, "Unzila! Seerhi."
"Jee," Unzila apni zindagi ki kashti Shameema baji kay saamnay seerhi laganay ki mushaqat mein apnay hi paseenay mein dibo deti.

"Ammi, Shameema baji ko aj phir cha-ay ki khushbu aagaee!" Chillatay howay apnay peechay ek gulabi rang mein lipti do jhuki jhuki aankhain chorh aati, per ye koi aj ki baat na thi, roz ka mamool tha. Shaam ki cha-ay kay saath papay na bhi hon, Shameema Baji ka hona bohat zaruri tha.

Shameema baji ko aath saal ki omer mein bohat hi shadeed bukhaar charha tha. Tab se unkay chehray per moti moti, garhi garhi, gehri gehri lakeeron ki lehrain si theen, khaal ki. Unki zabaan aur alfaaz ki adaaegi mein bhi kuch marorh se tha. Dosron ko un ki batein na samajh mein aain per Unzila sab samajhti thi. Aur sach to ye tha kay usay Shameema baji kay liye deewar se seerhi laganay mein jitna maza ata utna school se chutti kay waqt kumail dalwa kar gola ganda khanay mein bhi na aata. Saray mohallay mein sirf us hi kay ghar ek lakrhi ki seerhi thi jo woh apni deewar se lagati aur Shameema baji har shaam deewar phalaang ker us kay ghar cha-ay peenay aateen.